Pamana

Nagpasalin-salin sa lahat ng henerasyon,

Tila tanikalang di malagot ng panahon.

Pamana ng lahi sa akin ay ibinunton,

Magagawa ko ba na ako’y di sumangayon?

Sa dugong nananalaytay, ito’y dumadaloy,

Bawa’t pintig ng puso ko, ay isang panaghoy.

Bakal ma’y natutunaw, pag nadarang sa apoy.  

Buhay ba’y matatapos, buhay ba’y magtutuloy?

Sa dinami-rami ng ‘yong apo at ‘yong supling,

Bakit ako pa? Ang pagsamo at aking daing!

Traydor at tusong matsing, yan ang maituturing.

Sumpang di magmamaliw, ang akin ay kapiling

Buhay ay mahalaga, ako ay dobleng ingat,

Katawang batak, ehersisyo ang nararapat.

Wasto at tamang pagkain, ang dapat at sapat,

Sa altapresyong pamana, ay aking pantapat.

Opisyal na lahok ko para sa "Naka-apat na si Iyakhin, pumayat ka na ba?"

Shut Up and Burn