Amoy ng Sampaguita

Photo Credit here

Megamall, Isa sa pinakamalaking shopping mall dito sa Pilipinas. Binubuo ito ng tatlong gusali, A,B at C (ang bagong parking building). Ang isang gusali ay under construction pa na syang bubuo ng pang-apat na gusali ng mall na ito. Nahahati ito ng isang kalsada sa gitna, ang Julia Vargas Avenue. At dito madalas matatagpuan ang mahabang pila ng mga shoppers para sumakay ng taxi pauwi. At ang kakatwang karanasan na aking nasaksihan ay nangyari dito mismo sa pilahan.

Tanaw ko pa lang sa salaming pintuan ng mall ang mahabang pila ng mga tao na naghihintay makasakay. Inihanda ko na ang sarili ko na may katagalan bago ako makasakay pauwi. And as expected, iba-ibang mood ng tao na ang mapapansin mo sa mga nakapila. Inis, pagod at nakakabagot na paghihintay. Ganon naman talaga, may mga taong di makahintay. Yong tolerance ba nila ay napaka-iksi when it comes to waiting. And the result? Pinapatulan yong mga nag-aalok ng private service ride kahit sobrang mahal. Yong iba naman, aalis sa pila at sapilitang manghaharang ng taxi sa lugar na hindi dapat. Yan ang eksenang aking nadatnan sa mahabang pilahan ng taxi.

Mga kinse minutos na ko sa pila ngunit mas mabilis pa yata si Pong Pagong sa pag-usad. Traffic daw kasi kaya matumal ang dating ng mga taxi. Medyo mahaba na rin ang mga taong nasa aking likuran. Nasa ganon akong pagmamasid ng mapansin ko ang isang bata na nagtitinda ng sampagita. Inaalok nya ito sa mga taong nakapila doon. Isang teenager na lalaki sa aking harapan ang nag-abot ng barya sa batang nagtitinda. Na masayang nag-abot naman ng sampagitang kwentas katumbas ng baryang iniabot sa kanya. Tumanggi ang teenager na kunin ang sampagitang iniaabot sa kanya ng bata. "Limos ko na sayo yan at sayo na ang sampagita mo" Ngunit mapilit na iniabot ng bata ang sampagita... "hindi po ako nagpapalimos... nagtatrabaho po ako, kunin nyo na po itong sampagita." Napakamot sa ulo niya ang teenager at napilitang kunin ang sampagita. Halos lahat ng nakarinig ng usapang ito ay napalingon... maging ako ay napangiti dahil sa nakita kong reaksyon ng teenager. Isang teenager na galing sa loob ng mall na may bitbit ng magarang pinamili at isang batang nagtitinda ng sampagita para mabuhay... ahhh isang napakagandang pagsasalarawan... kitang kita ang pagkakaiba ng antas ng kanilang kalagayan.   

Sa wakas umusad na rin ang pila... narating ko na ang unahan at ako na ang susunod na makakasakay. Nilingon ko ang pilang aking pinagdaanan. Nakakamangha at sa wakas ay andito na ko, sa mismong unahan na inaasam ng maraming nakapila. At ang isang kapansin-pansin, lahat sila ay may hawak na sampagita. Bago ako sumakay, nalanghap ko pa ang mabangong samyo... "Ang Amoy ng Sampagita"

Sir, saan po kayo? Ang bungad ni manong driver.... Boni Avenue po, at Manong, pakisabit po nitong sampagita dito sa taxi nyo... mabango po yan.....